पार्टी भित्र देखिएका समस्याहरुलाई हल गर्दे एकतावद्व भएर अगाडि बढ्नु पर्ने :पूर्व मन्त्री राई
धनकुटा । पुर्व खानेपानी मन्त्री तथा नेकपा एमाले केन्द्रिय सदस्य राजेन्द्र कुमार राईले पार्टी भित्र देखिएका सानातिना समस्याहरुलाई हल गर्दे एकतावद्व भएर अगाडि बढ्नु पर्ने बताउनु भएको छ ।
आज धनकुटाकाे पाख्रीवासमा आयोजित नेकपा एमाले पाख्रीवास नगर कमिटीकाे दोस्रो अधिवेशनलाई सम्बोधन गर्दै उहाँले त्यस्तो बताउनु भएको हो ।
पार्टीका नगर कमिटी अध्यक्ष शान्तिराम गौतमको अध्यक्षतामा सञ्चालित अधिवेशनमा बोल्दै पूर्व मन्त्री राईले यसअघिको निर्वाचनमा आफ्नै पार्टीका साथिहरु आफ्ना उम्मेद्वारलाई हराउन लागि परेको भन्दै त्यसको समीक्षा हुने उल्लेख गर्नु भयो । उहाँले विकास निर्माणको प्रसंगलाई जाेड्दै यहाँ आफ्नो पार्टीको पहलमा धेरै कामहरु भईरहेको उल्लेख गर्नु भयो ।
उहाँले पाख्रीवास-फलाटे-अधेरी घाट सडक पीच हुँदै गरेकाे भन्दै अन्य सडकहरु पनि क्रमवद्व रुपमा निर्माण गर्दै लाने बताउनु भयो ।
त्यस्तै खानेपानी तर्फ भुल्के खानेपानीको विषयलाई जाेड्दै उहाँले यो आयोजमाको अब ३० प्रतिशत मात्र काम बाँकी रहेको उल्लेख गर्नु भएको छ । खानेपानी जनताको मौलिक अधिकारको विषय भएकाेले खानेपानी आयोजनाको काम कसैले रोक्न नसक्ने उहाँले बताउनु भयो ।
