आइपिएल : गुजरातको तेस्रो जीत, हैदाराबादको पाँचौं हार
काठमाडौं, २५ चैत । गुजरात टाइटन्सले तेस्रो जीत हासिल गरेको छ ।
इन्डियन प्रिमियर लिग (आइपिएल) मा आइतबार घरेलु टोली सनराइजर्स हैदराबादविरुद्ध ७ विकेटको सहज जित दर्ता गरेर तेस्रो जीत निकालेको हो ।
राजिव गान्धी अन्तर्राष्ट्रिय क्रिकेट मैदानमा हैदाराबादले प्रस्तुत गरेको १५३ रनको लक्ष्य गुजरातले १६।४ ओभरमा तीन विकेट गुमाउँदै पूरा गर्यो ।
गुजरातका लागि कप्तान शुभमन गिलले ४३ बलमा ९ चौकाको मद्दतले अविजित ६१ रनको योगदान गरे । यसैगरी वासिङ्टन सुन्दरले ४९ र सेर्फन रादरफोर्डले अविजित ३५ रन बनाउन सफल भएका थिए ।
गिल र सुन्दरले ९० रनको साझेदारी गरे पनि हैदराबादका लागि मोहम्मद शमीले दुई र कप्तान प्याट कमिन्सले एक विकेट लिएका थिए ।
त्यसअघि टस हारेर ब्याटिङको निम्तो पाएको हैदराबादले निर्धारित २० ओभरमा आठ विकेट गुमाउँदै १५२ रनको योगफल तयार पारेको थियो।
लगातार तेस्रो जितसँगै चार खेलमा ६ अंक जोडेको गुजरात दोस्रो स्थानमा उक्लिएको छ भने लगातार चौथो हार बेहोरेको हैदराबाद ५ खेलबाट दुई अंकका साथ पुछारमा छ ।
