बलात्कारमा दोषी ठहर पछि फरार ब्यक्ति १५ वर्षपछि पक्राउ
विराटनगर । बलात्कार मुद्दामा उच्च अदालत विराटनगरबाट दोषी ठहर भएका १ जना व्यक्ति १५ वर्षपछि पक्राउ परेका छन् ।
सुनसरीको बराहक्षेत्र नगरपालिका–७ का ५९ वर्षीय शुक्रबहादुर नेपाली (सार्की)लाई प्रहरीले मंगलबार साँझ पक्राउ गरेको हो । सुनसरी प्रहरीका प्रवक्ता डीएसपी योगराज खतिवडाका अनुसार अस्थायी प्रहरी चौकी बांगेबाट खटिएको टोलीले अस्थायी प्रहरी चौकी रेल–वे धरानसँग समन्वय गरेर नेपालीलाई पक्राउ गरेको हो ।
नेपालीलाई बलात्कार (जबरजस्ती करणी) मुद्दामा उच्च अदालत विराटनगरले २०६७ साल वैशाख २० गते दोषी ठहर गरेको थियो । कसुरदार ठहर भएका उनलाई अदालतले ५ वर्ष कैद सजायको फैसला गरेको थियो ।
तर, उनी सजाय भुक्तान नगरिकन फरार भइरहेका थिए । धरान उपमहानगरपालिका–१७ रेल–वे लाइन आसपासमा लुकिपिछी बसिरहेका बेला पक्राउ परेका नेपालीलाई प्रहरीले आवश्यक कारबाहीका लागि जिल्ला अदालत सुनसरीमा पेस गरेको छ ।
