इटहरीका युवकको मृत्यु,प्रहरीको कुटपिटबाट मृत्यु भएको परिवारको आरोप
इटहरी । प्रहरीको कुटपिटबाट इटहरीका एक युवकको मृत्यु भएको परिवारले आरोप लगाएका छन्।
इटहरी उपमहानगरपालिका–२ का २० वर्षीय युवराज निरौलाको धरानस्थित तीनकुने प्रहरी चौकीमा चेकजाँचका क्रममा कुटपिट भएको र त्यसकै कारण मृत्यु भएको परिवारको भनाइ छ।
साउन ९ गते साँझ ८ बजे धरान जाँदै गरेका निरौला र उनका साथी उदयपुर बेलका–३ का २२ वर्षीय दीपक कटुवाललाई प्रहरीले लागूऔषध सेवन गरेको आशंकामा रोकेको थियो। सोधपुछको क्रममा प्रहरीसँग विवाद हुँदा केही प्रहरीले निरौलामाथि हात र बुटले छाती र टाउकोमा प्रहार गरेको मृतकका भाइ सन्तोष निरौलाले बताएका छन्।
गम्भीर घाइते भएका निरौलाको उपचारका क्रममा कोशी अस्पताल, विराटनगरमा मृत्यु भएको हो। घटनापछि आक्रोशित परिवार र आफन्तजनले इलाका प्रहरी कार्यालय धरानमा घेराउ गरी दोषीलाई कारबाहीको माग गरेका छन्।-नीलोपाटीबाट
