खोटाङमा मृत फेला परेका दिदीभाइको चिहान प्रहरी नियन्त्रणमा
खोटाङ । खोटाङको दिप्रुङ चुईचुम्मा गाउँपालिका–३, छोरम्बुका ११ वर्षीय मेनिषा बस्नेत र ६ वर्षीय मेगराज बस्नेतको शव गाडिएको स्थानलाई प्रहरीले नियन्त्रणमा लिएको छ।
साउन २२ गते दिदीभाइसहित ६ जना बालबालिका घरमा जानकारी नदिई वेपत्ता भएका थिए। खोजीक्रममा राति १२ बजे दिप्रुङ चुईचुम्मा गाउँपालिका–२, डाँडाडाउँको चेपाभिरबाट करिब एक हजार मिटर तल खरुवा खोलामा दुवैको शव फेला परेको जिल्ला प्रहरी कार्यालय खोटाङले जनाएको छ। पौडी खेल्न साप्सुखोला पुगेका उनीहरू भीरबाट खस्दा पानीमा डुबेर मृत्यु भएको प्रारम्भिक अनुसन्धानमा खुलेको प्रहरीले जनाएको छ।
लडेर मृत्यु भएको यकिन भन्दै परिवारले साउन २३ गते शवलाई घरबाट करिब तीन किलोमिटर दक्षिणमा पर्ने लाफेटारमा गाडेको थियो। तर कानुनी प्रक्रिया पूरा नगरी चुपचाप गाडिएको सूचनापछि प्रहरीचौकी दिप्रुङ चुईचुम्माले साउन २४ गते स्थलमा पुगेर चिहान नियन्त्रणमा लिएको हो।
प्रहरीका अनुसार, थप अनुसन्धान र कानुनी प्रक्रिया पूरा गर्न इलाका प्रहरी कार्यालय खोटाङबजारबाट टोली खटाइएको छ। बस्नेत दिदीभाइसँगै हराएका अन्य चार बालबालिका भने सकुशल भेटिएका छन्।-खबरखेतीबाट
