ताप्लेजुङ घर भई झापामा बसेका आगलागीबाट घाइते भएकी वृद्धाको मृत्यु
झापा । ताप्लेजुङ घर भई झापाको कन्काई नगरपालिका–३ सुरुङ्गामा डेरा गरी बस्ने ८१ वर्षीया बाटुली माया दाहालको आगलागीका कारण मृत्यु भएको छ ।
उनी गत साउन २२ गते आगलागीमा परेर गम्भीर घाइते भएकी थिइन् । ध्रुव श्रेष्ठको ३ तले पक्की घरको दोस्रो तलामा बस्दै आएकी दाहाल खाना पकाउने क्रममा ग्यास सिलिण्डर लिकेज भएर आगलागीमा परेकी थिइन् ।
आगोले शरीरका विभिन्न भाग जलेपछि तत्काल कनकाई नगर अस्पताल लगिएको थियो । त्यहाँबाट थप उपचारका लागि बिर्तामोडको बी एण्ड सी अस्पताल हुँदै काठमाडौंस्थित कीर्तिपुर बर्न अस्पताल पुर्याइयो ।
स्वास्थ्य अवस्था गम्भीर भएकी दाहाललाई भदौ २ गते अस्पतालबाट डिस्चार्ज गरेर घरमा ल्याइएको थियो । स्वास्थ्य अवस्थामा सुधार नहुँदै बिहीबार बिहान उनको मृत्यु भएको झापा प्रहरी प्रवक्ता डीएसपी खगेन्द्रबहादुर खड्काले बताए ।
शवलाई पोष्टमार्टमका लागि मेची प्रादेशिक अस्पतालमा राखिएको छ । उक्त आगलागीबाट करिब २ लाख रुपैयाँ बराबरको क्षति भएको प्रहरीको भनाइ छ ।
