बेलायतमा एक बर्ष बसेर फर्केपछि वडाध्यक्षले पुन: सम्हाले जिम्मेवारी
दाङ । दाङको एक गाउँपालिकाका वडाध्यक्ष वैदेशिक रोजगारीबाट फर्केर पुन : वडाध्यक्षको जिम्मेवारी सम्हालेका छन् ।
राप्ती गाउँपालिका–८ का वडाध्यक्ष चन्द्रबहादुर गुरुङ वैदेशिक रोजगारकोलागि बेलायत गएका थिए । बहाल भएकै अबस्थामा रोजगारकोलागि बेलायत गएका अध्यक्ष गुरुङ एक बर्षपछि फर्केका हुन् । उनी २०८१ साउन २० मा बेलायत गएका थिए।
एक हप्ताअघि मात्रै वेलायतबाट घर आएको र दुई/तीनदेखि वडाध्यक्षको जिम्मेवारी सम्हालेको उनले बताए । कार्यपालिकाबाट अनुमति नलिएको भएपनि जानकारी गराएर विदेश गएको समेत उनले बताए । वडा सदस्य चम्फा पुनलाई कार्यवहाक दिएर गएको उनले बताए ।
यता अनुमति नलिएर विदेश जाने र पुनः आएर पद सम्हाल्ने कुराको कार्यपालिका सदस्यहरुले भने विरोध जनाएका छन् । उनी बैठकमा आएपछि शुक्रबार भएको कार्यपालिका बैठक समेत चल्न सकेन् । गुरुङ बैठकमा सहभागी भएपछि उनलाई कुरा राख्न दिईएको थियो । तर, उनको कुरा चित्त बुझ्दो नभएपछि प्रबक्ता तथा वडा नं. २ का अध्यक्ष पहलवान चौधरी, वडा–४ का अध्यक्ष वीरबहादुर चौधरी, वडा–६ का अध्यक्ष दीपक कुमार चौधरी, कार्यपालिका सदस्य रण बहादुर पुजालीले फरकमत दर्ज गरेर बाहिरिएका थिए ।
गाउँपालिकाका अध्यक्ष प्रकाश बिष्टले वडाध्यक्ष गुरुङलाई हाजिर गराउने वा नगर्ने विषयमा कानुनी परामर्श लिएर मात्रै निर्णय हुने बताए । गुरुङ एमालेबाट निर्वाचित वडाध्यक्ष हुन् । २०७९ को चुनाबमा उनी विजयी भएका हुन् । उनी निर्वाचित हुनुभन्दा पहिले सोही वडाको कार्यालय सहयोगीको रुपमा कार्यरत थिए ।
