कोशी प्रदेशका सेवाग्राहीलाई इटहरी र बिर्तामोडबाट मात्रै इम्बोस्ड नम्बर वितरण
विराटनगर । कोशी प्रदेशमा सुनसरीको इटहरी र झापाको बिर्तामोडमा १ असोज देखि सवारी साधनमा इम्बोस्ड नम्बर जडान थाल्ने तयारी भइरहेको छ । इम्बोस्ड नम्बर प्लेट जडान तीव्रता दिने भनिएपनि कोशीका सेवाग्राहीका लागि यी दुई कार्यालयबाट मात्रै दिने सेवाले यसलाई धान्न सहज नहुने देखिन्छ ।
सवारीसाधन दर्ता, नामसारी वा नवीकरणमा इम्बोस्ड नम्बर अनिवार्य गरेको छ । त्यस बाहेक पायक पर्ने समय र कार्यालय गएर यस्तो नम्बर प्लेट राख्न समेत भनिएको छ । तर, कोशी प्रदेशमा अहिले आठ वटा जिल्लामा यातायात व्यवस्था कार्यालय स्थापना गरेर सेवा दिइरहेको छ ।
प्रदेश सरकारले स्थापना गरेका यी कार्यालयबाट लाइसेन्स, सवारी नविकरण लगायतका सेवाहरु दिने गरिएको छ । इम्बोस्ड नम्बर प्लेटका लागि भने विभागले तोकेका दुईस्थलबाट सेवा सुरु गर्ने तयारी बाहेक सरकारले अर्को विकल्प नसोचेको हो ।
यातायात व्यवस्था कार्यालय सुनसरी, विराटनगर, झापा तथा सेवा कार्यालयको रुपमा इलाम, धनकुटा, उदयपुर र ओखलढुंगामा सेवा रहेको छ ।
