सात दिनभित्र फाइल टुंगो लगाउन मुख्यमन्त्री कार्कीको निर्देशन
विराटनगर । कोशी प्रदेशका मुख्यमन्त्री हिक्मतकुमार कार्कीले प्रदेशका हरेक मन्त्रालयमा पुग्ने फाइल ७ दिनभित्र टुंगो लगाउन निर्देशन दिएका छन् ।
कोशी प्रदेश सरकारको आर्थिक वर्ष २०८१ / ८२ को वार्षिक समीक्षा कार्यक्रममा मुख्यमन्त्री कार्कीले राय–परामर्शदेखि अन्य सबै खाले फाइल ७ दिनभित्र किनारा लगाउन र सम्भव नभए कारणसहित जानकारी दिन मन्त्रालयलाई आदेश दिएका हुन् । हामी कहाँ धेरै फाइल पनि हुँदैन तर अड्काउने प्रवृत्ति राम्रो होइन, यसमा सुधार होस्, उनले भने ।
मुख्यमन्त्री कार्कीले बेरुजु फछर्यौटमा पनि कडाइ गर्ने चेतावनी दिएका छन् ।उनले नीतिगत बेरुजु र असुलउपर गर्नुपर्ने बेरुजु छुट्टाएर पुस मसान्तभित्र किनारा लगाउन र आवश्यक परे कानुनी प्रक्रिया अघि बढाउन निर्देशन दिएका छन् ।
