उदयपुरमा १६ वर्षीया बालिका बलात्कृत, १५ वर्षीय बालकसहित दुई जना पक्राउ
उदयपुर । उदयपुरको त्रियुगा नगरपालिकामा १६ वर्षीया एक किशोरीमाथि सामूहिक बलात्कार भएको घटना सार्वजनिक भएको छ। घटनामा संलग्न रहेको आरोपमा प्रहरीले एक नाबालकसहित दुई जनालाई पक्राउ गरेको छ भने एक जना अझै फरार रहेका छन्।
उदयपुरका प्रहरी प्रमुख, प्रहरी उपरीक्षक (एसपी) राजन चापागाईंका अनुसार पक्राउ पर्नेहरूमा त्रियुगा नगरपालिका–१३ दनुवारी टोलका १५ वर्षीय बालक र १९ वर्षीय युवक रहेका छन्।
त्रियुगा नगरपालिकामा अस्थायी रूपमा बस्दै आएकी ती किशोरीलाई सामूहिक रूपमा करणी गरेको उजुरीका आधारमा उनीहरूलाई नियन्त्रणमा लिइएको हो।
फरार रहेका किशोरको खोजीका लागि प्रहरी टोली परिचालन गरिएको छ। प्रहरीले पक्राउ परेकाहरूमाथि थप अनुसन्धान प्रक्रिया अगाडि बढाएको जनाएको छ।
