संखुवासभाको खाँदबारी तुम्लिङटार बजारमा अनुगमन
खाँदबारी । जिल्ला प्रशासन कार्यालय संखुवासभाको संयोजनमा सोमबार खाँदबारी नगरपालिका–९ स्थित तुम्लिङटार बजार क्षेत्रमा बजार अनुगमन गरिएको छ ।
बजारमा बिक्री वितरण भइरहेका उपभोग्य वस्तुको अवस्था बुझ्न तथा व्यवसायीहरूलाई उपभोक्ता हितप्रति सचेत गराउने उद्देश्यले अनुगमन गरिएको हो ।
अनुगमन कार्यक्रममा जिल्ला प्रशासन कार्यालयको समन्वयमा जिल्ला प्रहरी कार्यालय, खाँदबारी नगरपालिका, उद्योग वाणिज्य संघ तथा नेपाल पत्रकार महासंघको सहभागिता रहेको थियो।
अनुगमनका क्रममा अधिकांश पसलहरू दर्ता तथा नवीकरण गरिएको र मूल्यसूची स्पष्ट रूपमा राखिएको पाइएको साथै उपभोक्ताको स्वास्थ्यमा गम्भीर असर पार्न सक्ने धेरैजसो पेय पदार्थहरू म्याद गुज्रिएको अवस्थामा भेटिएकाले ती सामग्रीहरू जफत गरिएको छ ।
उपभोक्ताको स्वास्थ्य सुरक्षालाई मध्यनजर गर्दै यस्ता अनुगमनलाई आगामी दिनमा थप नियमित र प्रभावकारी बनाइने जिल्ला प्रशासन कार्यालयले जनाएको छ।-सुरेन शाक्य/खांदबारी एफएम
