संखुवासभामा ज्वाइँको खुकुरी प्रहारबाट ससुरा गम्भीर घाइते
संखुवासभा । संखुवासभाको पाँचखपन नगरपालिका–८ आहालेमा ज्वाइँले खुकुरी प्रहार गर्दा एक वृद्ध गम्भीर घाइते भएका छन् ।
बुधबार दिउँसो करिब ४ बजे घरमै बसिरहेको अवस्थामा ७६ वर्षीय निङ्मा शेर्पामाथि खुकुरी प्रहार भएको हो । प्रहरीका अनुसार चैनपुर नगरपालिका २ पोखरी निवासी ४५ वर्षीय लाक्पा ओङ्दी शेर्पाले आफ्नै ससुरामाथि धारिलो हतियार प्रहार गरेका हुन् ।
घटनाको जानकारी प्राप्त हुनासाथ अस्थायी प्रहरी पोस्ट भर्तिवालडाँडा तथा इलाका प्रहरी कार्यालय वानाबाट प्रहरी निरीक्षक सुन्दरकुमार यादवको कमाण्डमा पाँच जनाको टोली घटनास्थल पुगेको थियो । खुकुरी प्रहारपछि फरार भएका ओङ्दीलाई गाउँमै लुकेको अवस्थामा प्रहरीले पक्राउ गरेको जिल्ला प्रहरी कार्यालय संखुवासभाले जनाएको छ ।
गम्भीर घाइते निङ्मा शेर्पाको गाला र नाकमा चोट लागेको छ । उनलाई उपचारका लागि आधारभूत अस्पताल वानामा ल्याइएको प्रहरीले जानकारी दिएको छ। घटनाबारे थप अनुसन्धान भइरहेको प्रहरीले जनाएको छ ।-खांदबारी एफ एम
