३३ किलो सुन प्रकरण: गोरेलाई अपहरण मुद्दामा उच्च अदालतद्वारा थप १० वर्ष सजाय कैदको फैसला
विराटनगर । उच्च अदालत विराटनगरले ‘३३ किलो सुन तस्करी’ तथा सनम शाक्य हत्या प्रकरणमा चूडामणि उप्रेती ‘गोरे’ लाई अपहरण तथा शरीर बन्धक मुद्दामा थप १० वर्ष कैदको सजाय सुनाएको छ ।
जिल्ला अदालत मोरङको अघिल्लो फैसलालाई आंशिक रूपमा उल्ट्याउँदै उच्चले आईतबार यस्तो फैसला सुनाएको हो ।
न्यायाधीशद्वय महेन्द्रनाथ उपाध्याय र प्रकाशचन्द्र अधिकारीको संयुक्त इजलासले अन्य केही प्रतिवादीको हकमा पनि सजाय परिवर्तन गरेको छ । उच्चले सोही प्रकरणमा जोडिएका प्रहरी अधिकारीहरुलाई भने सफाइ दिएको छ ।
योसँगै गोरेको कुल जेल सजाय ३० वर्ष पुगेको छ भने अन्य केही प्रतिवादीको सजाय घटाइएको छ।
