धनकुटाका स्थानीय तहहरूको कार्यसम्पादन मूल्याङ्कनमा साँगुरीगढी गाउँपालिका पहिलो
धनकुटा । राष्ट्रिय प्राकृतिक स्रोत तथा वित्त आयोगले गरेको स्थानीय तहहरूको कार्यसम्पादन मूल्याङ्कनमा धनकुटाको साँगुरीगढी गाउँपालिकाले सबैभन्दा बढी अंक पाएको छ ।
सार्वजनिक नतिजा अनुसार साँगुरीगढी ६६.५२ अंक प्राप्त गर्दै पहिलो भएको छ । यस्तै धनकुटा नगरपालिका ६४.०५ अंकसहित दोस्रो र चौबिसे गाउँपालिका ६३.१६ अंकसहित तेस्रो भएको छ ।
यस्तै महालक्ष्मी नगरपालिका ६३.१२ अंकसहित चौथो, सहिदभूमि गाउँपालिका ५७.९ अंकसहित पाँचौँ र पाख्रिबास नगरपालिका ४३.५९ अंकसहित छैटौँ भएको छ । छथर जोरपाटी गाउँपालिका ३९.६४ अंकसहित सबैभन्दा अन्तिम स्थानमा परेको छ ।
मूल्याङ्कनमा आयोगले राजस्व परिचालनको अवस्था, बजेट खर्च प्रगति, बेरुजु व्यवस्थापन, सूचना सफ्टवेयरको प्रयोग, शिक्षा तथा स्वास्थ्यसँग सम्बन्धित सामाजिक सूचक, विद्यार्थी भर्ना दर लगायतका १७ वटा सूचक प्रयोग गरेको थियो ।
