ताप्लेजुङको पाथीभरा मन्दिर परिसरमा दर्शन गर्न गएका एक अज्ञात वृद्ध पुरुष बेपत्ता
ताप्लेजुङ । पाथीभरा मन्दिर परिसरमा दर्शन गर्न गएका एक अज्ञात वृद्ध पुरुष बेपत्ता भएका छन्। ताप्लेजुङको फुङलिङ नगरपालिका–११ स्थित मन्दिर क्षेत्रमा हिजो बेलुका करिब ६ बजे ती व्यक्ति शौचालयतर्फ गएपछि फर्किएनन्।
मन्दिरका पुजारीका अनुसार करिब ६० वर्षजति देखिने, दौरा–सुरुवाल र कोट लगाएका तथा कान नसुन्ने जस्तो व्यवहार देखिएका ती व्यक्तिले शौचालयको बाटो सोधेका थिए। पुजारीले दिशा देखाइदिएपछि उनी त्यतै गएका थिए तर लामो समयसम्म नफर्किएपछि खोजी सुरु गरिएको हो।
मन्दिरका कर्मचारी र सशस्त्र प्रहरी बलले परिसर तथा आसपास क्षेत्रमा खोजी कार्य जारी राखेका छन्। प्रहरीले जानकारी दिएअनुसार ती व्यक्तिको एउटा झोला माथिल्लो फेदीस्थित एक होटलमा फेला परेको छ, तर झोला भित्र परिचय खुल्ने कुनै कागजात भेटिएको छैन। होटलमा बस्दा पनि उनले आफ्नो विवरण नलेखाएको बताइएको छ।
प्रहरीले बेपत्ता व्यक्तिको पहिचान तथा अवस्थाबारे सूचना भए नजिकको प्रहरी कार्यालयमा खबर गर्न सर्वसाधारणलाई अनुरोध गरेको छ।-स्रोत:आमसंचार
