मोरङको सुन्दरहरैँचामा फेला परेको शंकास्पद वस्तु रंगको बट्टा भएको पुष्टि
मोरङ । मोरङको सुन्दरहरैँचा खण्डमा बुधबार अपरान्ह फेला परेको शंकास्पद वस्तु रंगको बट्टा भएको पुष्टि भएको छ ।
सुन्दरहरैँचा नगरपालिका–१० स्थित सडकको उत्तरतर्फ अपरान्ह करिब १२ः१५ बजेतिर कालो टेपले बेरेको र कालो तार बाहिर निकालिएको अवस्थामा सानो डल्लो देखिएपछि स्थानीयमा त्रास सिर्जना भएको थियो ।राजमार्ग क्षेत्रमा शंकास्पद वस्तु भेटिएपछि सुरक्षाकर्मीलाई खबर गरिएको थियो ।
सूचनापछि खटिएको नेपाली सेनाको बम डिस्पोजल टोलीले उक्त वस्तु सुरक्षित रूपमा जाँच गर्दा बम नभई रंगको बट्टालाई कालो टेपले बाँधेर सडकमा फालिएको पाइएको प्रहरीले जनाएको छ ।
वस्तु बम नभएको यकिन भइसकेपछि सुरक्षाकर्मीको टोली घटनास्थलबाट फर्किएको छ ।
