मोरङ बूढीगंगाको मुसहर बस्तीमा भीषण आगलागी, १५ वटाभन्दा बढी घर जलेको अनुमान
मोरङ । मोरङको बूढीगंगा गाउँपालिकाको मुसहर बस्तीमा बुधबार दिउँसो भीषण आगलागी भएको छ ।
प्रहरीका अनुसार बूढीगंगा–४ स्थित गोकुवा चोकबाट पूर्वमा रहेको मुसहर बस्तीमा दिउँसो २ बजेतिर आगलागी सुरु भएको थियो । आगलागीमा परेर १५ वटा भन्दा बढी घर जलेको अनुमान गरिएको छ । यद्यपि, क्षतिको विवरण यकिन भइसकेको छैन ।
आगो नियन्त्रणका लागि इलाका प्रहरी कार्यालय नेमुवाबाट सई अशोक चौधरीको नेतृत्वमा टोली खटिएको थियो । साथै, जिल्ला प्रहरी कार्यालय मोरङबाट वरिष्ठ सई राजेन्द्र कटवालको नेतृत्वमा समेत टोली परिचालन गरिएको थियो ।
विराटनगर महानगरपालिकाबाट गएका दमकल र स्थानीयको सहयोगमा आगो नियन्त्रणमा लिइसकिएको प्रहरीले जनाएको छ । आगलागी भएको बस्तीका सबैजसो घर फुसको छाना भएका र टाटीबेराले बारेका थिए ।
आगलागीको कारण खुल्न सकेको छैन ।
प्रहरीले थप अनुसन्धान गरिरहेको छ । आगोले घर खरानी बनाइदिएपछि भूमिहीन र मजदुरीमा निर्भर रहेका अति विपन्न मुसहर परिवारहरुको बिचल्ली भएको छ ।
