सुनसरीको रामधुनीमा पिकअपको ठक्करबाट दुई जनाको मृत्यु
सुनसरी । सुनसरीको रामधुनी नगरपालिका–५ लगुना मोडस्थित पूर्व–पश्चिम राजमार्गमा पिकअप गाडीको ठक्करबाट दुई जनाको मृत्यु भएको छ।
बिहीवार बिहान पूर्वबाट पश्चिमतर्फ जाँदै गरेको नम्बर नखुलेको तरकारी बोक्ने पिकअप गाडीले साइकल यात्री र पैदलयात्रीलाई ठक्कर दिँदा दुर्घटना भएको प्रहरीले जनाएको दुर्घटनापछि इलाका प्रहरी कार्यालय पकलीबाट प्रहरी नायव निरीक्षक कमल नेपालीको कमाण्डमा खटिएको टोलीले घाइते दुवै जनालाई तत्काल उपचारका लागि झुम्कास्थित अस्पताल पठाएको थियो। त्यहाँबाट थप उपचारका लागि विराटनगरस्थित टिचिङ अस्पताल पठाइएको थियो।
घटनामा पैदलयात्री रामधुनी नगरपालिका–३ का ६१ वर्षीय विष्णु प्रसाद खतिवडाको उपचारको क्रममा बिहीवार बिहान ६ः१३ बजेतिर मृत्यु भएको प्रहरीले जनाएको छ।
त्यस्तै, साइकल चालक इटहरी उपमहानगरपालिका–१८ नयाँ टोलका अन्दाजी ३५ वर्षीय देवराज बुढाथोकीको पनि उपचारकै क्रममा राति १०ः५ बजेतिर मृत्यु भएको हो।
दुर्घटनामा संलग्न पिकअप गाडी घटनापछि फरार भए पनि प्रहरीले को २ च २०७९ नम्बरको पिकअप गाडी कोशी गाउँपालिका–१ भन्सार टोल नजिक भित्री सडक किनारमा लुकाइराखेको अवस्थामा फेला पारी इलाका प्रहरी कार्यालय पकलीमा राखेको छ।फरार चालकको खोजी कार्य भइरहेको प्रहरीले जनाएको छ।
