मोरङको बेलबारीमा आगलागी हुंदा दुई घर जलेर नष्ट, २५ लाखको क्षति
बेलबारी । मोरङको बेलबारी नगरपालिका ५ कसेनीमा शनिबार दिउँसो भीषण आगलागी हुँदा २ वटा घर जलेर नष्ट भएका छन्।
दिउँसो साढे १ बजेतिर स्थानीय भगरु खा थारुको घरबाट विद्युत् सर्ट भई सुरु भएको आगोले छिमेकी दुधुलाल थान्दारको घरमा समेत क्षति पुऱ्याएको हो।
आगलागीबाट घरभित्र रहेका खाद्यान्न, लत्ताकपडा र अन्य जिन्सी सामग्रीका साथै गोठमा रहेका चौपाया समेत जलेका छन् ।
प्रहरीका अनुसार ६५ वर्षीय भगरु खा थारुको इँटाको गारो र टिनको छानो भएको एकतले घर पूर्ण रूपमा नष्ट भएको छ। सो आगलागीमा परी घरभित्रका सबै सामग्रीका साथै ६ वटा बाख्रा र ५ वटा कुखुराको समेत मृत्यु भएको छ। उनको करिब १५ लाख रुपैयाँ बराबरको क्षति भएको प्रारम्भिक अनुमान गरिएको छ।
यस्तै ६० वर्षीय दुधुलाल थान्दारको टाँटीबेरा र टिनको छानो भएको घर पनि जलेर खरानी भएको छ। उनको घरभित्रका सम्पूर्ण सामग्रीसहित २ वटा बाख्रा र २ वटा कुखुरा जलेर मर्दा करिब १० लाख रुपैयाँ बराबरको क्षति भएको छ।
घटनाको जानकारी पाएलगत्तै अस्थायी प्रहरी चौकी सोमबारेबाट प्रहरी नायब निरीक्षक दुर्गाबहादुर बस्तोलाको कमाण्डमा खटिएको टोली, बेलबारी नगरपालिकाको दमकल र स्थानीय बासिन्दाको सक्रियतामा दिउँसो २ बजेर २० मिनेटमा आगो नियन्त्रणमा लिइएको थियो।
आगलागीबाट मानवीय क्षति भने नभएको प्रहरीले जनाएको छ।
