फेरि बढ्यो पेट्रोल, डिजेल र मट्टितेलको भाउ
काठमाडौ । नेपाल आयल निगमले पेट्रोल, डिजेल र मट्टितेलको भाउ फेरि प्रतिलिटर १५/१५ रुपैयाँ बढाएको छ । निगम सञ्चालक समितिको बिहीबारको निर्णयअनुसार शुक्रबार बिहान १२:०१ बजेदेखि लागू हुने गरी इन्धनको मूल्यमा भारी वृद्धि गरिएको हो ।
नयाँ मूल्यसूची अनुसार अब काठमाडौं, पोखरा र दिपायल (तेस्रो वर्ग) मा पेट्रोलको खुद्रा मूल्य प्रतिलिटर २०२ रुपैयाँ पुगेको छ भने डिजेल र मट्टितेलको मूल्य प्रतिलिटर १८२ रुपैयाँ कायम भएको छ । यसैगरी, दोस्रो वर्गमा पर्ने सुर्खेत र दाङमा पेट्रोल २०१ रुपैयाँ र डिजेल/मट्टितेल १८१ रुपैयाँ पर्नेछ ।
पहिलो वर्गअन्तर्गतका चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा भने पेट्रोलको मूल्य १९९ रुपैयाँ ५० पैसा र डिजेल/मट्टितेलको मूल्य १७९ रुपैयाँ ५० पैसा तोकिएको छ ।
मध्यपूर्वमा जारी युद्धका कारण अन्तर्राष्ट्रिय बजारमा पेट्रोलियम पदार्थको मूल्य निरन्तर बढिरहेको र इन्डियन आयल कर्पोरेसन (आईओसी) बाट नयाँ खरिद मूल्य बढेर आएकाले मूल्य समायोजन गर्नुपरेको निगमले जनाएको छ । उपभोक्ताको हितलाई मध्यनजर गर्दै निगमसँग रहेको मूल्य स्थिरीकरण कोषको रकम समेत उपयोग गरेर यो मूल्य तय गरिएको विज्ञप्तिमा उल्लेख छ ।
निगमका अनुसार मूल्य बढाउनुअघि पेट्रोलमा ४७.१२ रुपैयाँ र डिजेलमा १३३.४५ रुपैयाँ प्रतिलिटर घाटा थियो, जसका कारण निगमलाई पाक्षिक रूपमा १३ अर्ब २१ करोड रुपैयाँ घाटा हुने अवस्था थियो ।
इन्धनको भाउ लिटरमै १५ रुपैयाँ बढाएपछि पनि निगमलाई पेट्रोलमा प्रतिलिटर ३४ रुपैयाँ ३६ पैसा, डिजेलमा १२० रुपैयाँ ५४ पैसा र खाना पकाउने ग्यासमा प्रतिसिलिन्डर ४१६ रुपैयाँ ३७ पैसा घाटा नै रहेको निगमले जनाएको छ । निगमले यसअघि पनि मूल्यवृद्धि गरेको थियो ।
