मोरङबाट लागूऔषध ब्राउन सुगर र चरेस सहित एक जना पक्राउ
उर्लाबारी । जिल्ला प्रहरी कार्यालय मोरङले लागूऔषधसहित एक जनालाई पक्राउ गरेको छ।
जिल्ला प्रहरी कार्यालय विराटनगर, मोरङका अनुसार उर्लाबारी नगरपालिका–२ स्थित एक घरमा लागूऔषध कारोबार भइरहेको विशेष सूचनाका आधारमा प्रहरीले छापा मारेको थियो। छापा क्रममा सोही स्थानमा बस्दै आएका करिब २० वर्षीय विनोद मगरलाई शंकास्पद अवस्थामा नियन्त्रणमा लिइएको प्रहरीले जनाएको छ।
प्रहरीले खानतलासी गर्दा कोठाभित्र लुकाइ राखिएको अवस्थामा ब्राउन सुगर ५७० मिलिग्राम र चरेस १.३० मिलिग्राम फेला पारी बरामद गरेको जनाएको छ।
बरामद लागूऔषधसहित उनलाई नियन्त्रणमा लिएर इलाका प्रहरी कार्यालय उर्लाबारीमार्फत थप अनुसन्धान भइरहेको जिल्ला प्रहरी कार्यालय मोरङले जानकारी दिएको छ।
प्रहरीले लागूऔषध कारोबार नियन्त्रणका लागि निगरानी तथा कारबाहीलाई अझ कडाइका साथ अघि बढाइने जनाएको छ।
