जिल्ला अदालत सुनसरी परिसरबाटै थुनुवा फरार भएपछि…
सुनसरी । चोरी मुद्दाका एक जना थुनुवा सुनसरी जिल्ला अदालत परिसरबाट मंगलबार दिउँसो फरार भएका छन् ।
तेह्रथुमको म्याङलुङ नगरपालिका–१ घर भइ सुनसरीको इटहरी उपमहानगरपालिका–२ स्थित चन्दिका तामाङको घरमा कोठा भाडा लिएर बस्दै आएका १९ वर्षीय सुरज खड्का फरार भएका हुन् । इलाका प्रहरी कार्यालय इटहरीको टोलीले सुरजलाई चोरी घटनामा चैत १६ गते पक्राउ गरेको थियो ।
इलाका प्रहरी कार्यालय इटहरीका असई (प्रहरी सहायक निरीक्षक) राजकुमार माझी नेतृत्वको टोलीले सुरजसहित ५ जना थुनुवालाई जिल्ला अदालत सुनसरी लगेको थियो । सुरज दिउँसो ४ः१० बजेतिर भागेको र अरु थुनुवा प्रहरी नियन्त्रणमै रहेको जिल्ला प्रहरी कार्यालय सुनसरीले जनाएको छ । खड्कालाई मंगलबार जिल्ला अदालत सुनसरीले १ लाख धरौटी माग गरेको थियो ।
जिल्ला प्रहरी कार्यालय सुनसरीका अनुसार सुरजको खोजीका लागि जिल्ला प्रहरी कार्यालय सुनसरीबाट इन्स्पेक्टर निराजन कार्की र इलाका प्रहरी कार्यालय इटहरीबाट डीएसपी सुवास हमालको नेतृत्वमा भिन्दाभिन्दै टोली परिचालन गरिएको छ । अन्य मातहतका प्रहरी कार्यालय र सादा पोसाकका प्रहरीसमेत परिचालन गरिएको छ ।
