सुनसरीमा मोटरसाइकल दुर्घटना, चालकको मृत्यु
धरान, २६ वैशाख । सुनसरीको बराहक्षेत्र नगरपालिका–५ स्थित तीनकुने मिलिजुली स्कुल नजिक आज बिहान भएको मोटरसाइकल दुर्घटनामा एक जनाको मृत्यु भएको छ ।
जिल्ला प्रहरी कार्यालय सुनसरीका अनुसार बिहान करिब ४ः३० बजे कालाबन्जार–धरान सडकखण्डमा प्रदेश १–०१–०१८ प ७८९२ नम्बरको मोटरसाइकल अनियन्त्रित भई सिमेन्टको कल्भर्टमा ठोक्किएको थियो । दुर्घटनापछि मोटरसाइकल करिब ३४ फिट तल पैनीमा खसेको प्रहरीले जनाएको छ ।
दुर्घटनामा मोटरसाइकल चालक मनिस बस्नेत को घटनास्थलमै मृत्यु भएको प्रहरीले जनाएको छ । ३० वर्षीय बस्नेतको दाहिने गालामा गहिरो चोट लागेको अवस्थामा शव पैनीमा फेला परेको थियो ।
स्थानीयले ठूलो आवाज सुनेपछि प्रहरीलाई खबर गरेका थिए । घटनापछि प्रहरीले शव परीक्षणका लागि बिपी कोइराला स्वास्थ्य विज्ञान प्रतिष्ठान पठाएको जनाएको छ ।
