झापामा गोमन सर्पले टोकेर सात वर्षीय बालक गम्भीर घाइते
झापा । झापामा गोमन सर्पले टोकेर सात वर्षीय बालक गम्भीर घाइते भएका छन् ।
कमल गाउँपालिका–५ गुजेश्वरी टोलका कर्णबहादुर राईका ७ वर्षीय छोरा सायंक राईलाई शुक्रबार बिहान घरभित्र खेलिरहेका बेला गोमन सर्पले दाहिने खुट्टामा टोकेको प्रहरीले जनाएको छ ।
सर्पदंशपछि बालकको अवस्था अचानक बिग्रिएपछि परिवारले तत्काल सर्पदंश उपचार केन्द्र दमक पुर्याएका थिए । त्यहाँ प्रारम्भिक उपचारपछि थप उपचारका लागि उनलाई बीएन्डसी अस्पतालमा भर्ना गरिएको छ ।
उपचारमा संलग्न चिकित्सकका अनुसार बालकको अवस्था गम्भीर रहेको छ । उनी बोल्न नसक्ने अवस्थामा रहेको बताइएको छ ।
गर्मी र वर्षायाम सुरु भएसँगै झापासहित तराईका जिल्लामा सर्पदंशका घटना बढ्न थालेका छन् । स्वास्थ्यकर्मीहरूले घर वरपर सफा राख्न, बालबालिकालाई सावधानी अपनाउन तथा सर्पले टोकेपछि ढिला नगरी उपचार केन्द्रमा पुर्याउन आग्रह गरेका छन् ।
