झापामा जंगली च्याउ खाँदा एकै परिवारका ११ जना बिरामी
झापा । झापाको बाह्रदशी गाउँपालिका–२ बुट्टाबारीमा जंगली च्याउ खाँदा एकै परिवारका ११ जना बिरामी परेका छन्।
आइतबार बिहान करिब १० बजे स्थानीय तेजबहादुर खवासको घरमा जंगलबाट ल्याइएको च्याउ पकाएर खाएपछि उनीहरूको स्वास्थ्यमा समस्या देखिएको हो।
बिरामी हुनेहरूमा ५० वर्षीया कमलामाया खवास, ३१ वर्षीय डिल्ली खवास, २० वर्षीया अनिता खवाससहित आठ जना बालबालिका रहेका छन्। उनीहरूलाई उपचारका लागि तत्काल प्रादेशिक अस्पताल भद्रपुर लगिएको थियो।
अस्पतालमा प्रारम्भिक उपचारपछि थप उपचारका लागि नौ जनालाई दमकस्थित बाल अस्पताल रिफर गरिएको छ। चिकित्सकका अनुसार दुई जनाको अवस्था मध्यम रहेको छ भने अन्यको स्वास्थ्य अवस्था सामान्य रहेको छ।
