लायन्स क्लबद्वारा विद्यालयमा आरओ वाटर प्लान्ट हस्तान्तरण
भैरहवा, ३० बैशाख । रुपन्देहीको लिलाराम न्यौपाने माध्यमिक विद्यालयमा विद्यार्थीहरूलाई स्वच्छ र सुरक्षित पिउने पानी उपलब्ध गराउने उद्देश्यले आरओ वाटर प्लान्ट हस्तान्तरण गरिएको छ।
सिद्धार्थ लायन्स क्लब, एभरेष्ट बैंक र लायन्स क्लब सिद्धार्थनगर लोटसको संयुक्त पहलमा बुधबार उक्त खानेपानी परियोजना विद्यालयलाई हस्तान्तरण गरिएको हो।
कार्यक्रममा क्लबका अध्यक्ष धर्मराज आचार्यले विद्यार्थीहरूलाई स्वच्छ र सुरक्षित पिउने पानी उपलब्ध गराउने उद्देश्यले परियोजना सञ्चालन गरिएको बताएका छन।
पछिल्लो समय विद्यालयमा विद्यार्थी संख्या बढ्दै गएपछि खानेपानी अभाव भएको जानकारी प्रधानाध्यापकबाट प्राप्त भएपछि नयाँ परियोजना सुरु गरेको अध्यक्ष आचार्यले जानकारी दिए।
परियोजनाको कुल लागत २ लाख ५० हजार रुपैयाँभन्दा बढी रहेको र जसमा एभरेष्ट बैंकले १ लाख ५० हजार रुपैयाँ आर्थिक सहयोग गरेको छ भने बाँकी रकम क्लबको आन्तरिक कोष तथा सदस्यहरूबाट संकलन गरिएको अध्यक्षको भनाइ छ।
विद्यालयमा जडान गरिएको प्रणालीमा शुद्ध र चिसो पानी उपलब्ध गराउन आरओ फिल्टर तथा कुलिङ मेसिन राखिएको छ। साथै स्टिल ट्याङ्की, पाइप र ट्यापहरू ‘फुड ग्रेड’ तथा ‘एन्टी–ब्याक्टेरियल’ प्रविधियुक्त रहेको क्लबले जनाएको छ।
कार्यक्रममा लायन्स क्लब सिद्धार्थनगर लोटसका अध्यक्ष सरिता आचार्यले आगामी दिनमा जडान गरिएका उपकरणहरूको संरक्षण र मर्मतका लागि विद्यालय र क्लबबीच सहकार्य जारी रहने प्रतिबद्धता व्यक्त गरेकी छन।
यस पहलले विद्यालयका विद्यार्थीलाई स्वच्छ, सुरक्षित र गुणस्तरीय पिउने पानी उपलब्ध गराउन महत्वपूर्ण योगदान पुग्ने विश्वास गरिए उनको भनाइ छ ।
