काठमाडौं महानगरका १० नगर प्रहरीलाई ‘हलुका सवारी चालक’ तालिम सम्पन्न
काठमाडौं । नेपाल प्रहरी प्रधान कार्यालय सवारी महाशाखाले काठमाडौं महानगरपालिका, महानगर प्रहरी बलका १० जना नगर प्रहरी कर्मचारीहरूलाई हलुका सवारी चालक तालिम प्रदान गरेको छ। नगर प्रहरीको कार्यक्षमता वृद्धि गर्ने उद्देश्यले सञ्चालित १६ दिने तालिम बुधबार सम्पन्न भएको हो।
तालिम समापनका अवसरमा आयोजित एक विशेष कार्यक्रममा सवारी महाशाखाका प्रहरी वरिष्ठ उपरीक्षक (एसएसपी) श्याम कृष्ण अधिकारीले प्रशिक्षार्थी तथा प्रशिक्षकहरूलाई प्रमाणपत्र प्रदान गरे।
प्रमाणपत्र वितरण गर्दै एसएसपी अधिकारीले तालिममा सिकेको व्यावसायिक ज्ञान, सीप र ड्राइभिङ कौशललाई आफ्नो कार्यक्षेत्रमा जिम्मेवारीपूर्वक र प्रभावकारी ढङ्गले प्रयोग गर्न निर्देशन दिए। सवारी चलाउँदा अपनाउनुपर्ने सुरक्षा सतर्कता र अनुशासनले नगर प्रहरीको सेवा प्रवाहलाई थप सुदृढ बनाउने उहाँको विश्वास थियो।
कार्यक्रममा तालिम सम्बन्धी प्रतिवेदन प्रस्तुत गर्दै प्रहरी निरीक्षक भरत कुमार श्रेष्ठले १६ कार्यदिनको उक्त तालिममा १० जना नगर प्रहरीहरूको सक्रिय सहभागिता रहेको जानकारी दिए।
तालिमका क्रममा उनीहरूलाई सवारी साधनको प्राविधिक पक्ष, ट्राफिक नियम र सुरक्षित चालकका गुणहरूबारे प्रयोगात्मक र सैद्धान्तिक ज्ञान दिइएको थियो।
