पूर्वगृहमन्त्री सुधन गुरुङ माथि छानबिन गर्न उच्च अदालतका पूर्वन्यायाधीशको नेतृत्वमा समिति गठन
काठमाडौं । सरकारले पूर्वगृहमन्त्री सुधन गुरुङको कार्यकाल र त्यसपछि उठेका विभिन्न सार्वजनिक सरोकारका विषयमा अध्ययन तथा छानबिन गर्न एक उच्चस्तरीय समिति गठन गरेको छ।
मन्त्रिपरिषद्को गत वैशाख २८ गते बसेको बैठकले उच्च अदालतका पूर्वन्यायाधीश अच्युतप्रसाद भण्डारीको अध्यक्षतामा तीन सदस्यीय छानबिन समिति गठन गर्ने निर्णय गरेको हो। समितिको सदस्यहरूमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि नेउपाने रहेका छन्।
प्रधानमन्त्री बालेन्द्र शाहका प्रेस तथा अनुसन्धान विज्ञ दिपा दाहालका अनुसार, वर्तमान प्रतिनिधिसभा सदस्यसमेत रहनुभएका गुरुङका सम्बन्धमा सार्वजनिक रूपमा उठेका विषयहरूको सत्यतथ्य अध्ययन गरी सरकारलाई राय सुझाव पेस गर्न समितिलाई जिम्मेवारी दिइएको छ।
समितिले आफ्नो कार्य प्रारम्भ गरेको १५ दिनभित्र प्रतिवेदन बुझाउनुपर्ने गरी समयावधि तोकिएको छ। पूर्वगृहमन्त्री गुरुङ मन्त्री रहँदा भएका निर्णय र त्यसपछि सार्वजनिक भएका विवादित विषयहरूलाई लिएर चौतर्फी प्रश्न उठेपछि सरकारले न्यायिक र प्रशासनिक विज्ञहरू सम्मिलित यो समिति बनाएको हो।
