छुट्टी मनाउन घर आएका भारतीय सेनामा कार्यरत धरानका २४ वर्षीय पाल्देन शेर्पाको मोटरसाइकल दुर्घटनामा मृत्यु
धरान । छुट्टी मनाउन घर आएका धरान सुन्दर बस्तीका २४ वर्षीय पाल्देन शेर्पाको मोटरसाइकल दुर्घटनामा निधन भएपछि यतिबेला सिंगो बस्ती शोकमा डुबेको छ।
भारतीय सेनामा विगत पाँच वर्षदेखि कार्यरत पाल्देन एक साताअघि मात्रै घर आएका थिए। परिवारसँग समय बिताउँदै भविष्यका योजना र सपनाबारे कुरा गरिरहेका उनी बुधबार भएको मोटरसाइकल दुर्घटनामा गम्भीर घाइते भएका थिए।
दुर्घटनापछि तत्काल उपचारका लागि अस्पताल लगिए पनि चिकित्सकको प्रयास सफल हुन नसक्दा उनको निधन भएको परिवार स्रोतले जनाएको छ। जवान छोराको असामयिक निधनले परिवार शोकमा डुबेको छ भने स्थानीयवासीसमेत भावुक बनेका छन्।
पाल्देनको शव विराटनगरमा पोस्टमार्टमपछि आफन्तलाई बुझाइएको थियो। त्यसपछि खत्री धारामा अन्त्येष्टि गरिएको छ। अन्तिम श्रद्धाञ्जली दिन सयौं स्थानीयवासी, आफन्त र साथीभाइ पुगेका थिए।
घरमा खुसी बोकेर आएका पाल्देन अब परिवार र साथीभाइको सम्झनामा मात्रै सीमित बनेका छन्।
