सुनसरी जिल्ला अदालतको शौचालयबाट प्रहरीलाई झुक्याएर फरार भएका १९ वर्षीय खड्का अन्ततः पक्राउ
सुनसरी । सुनसरी जिल्ला अदालतको शौचालयबाट इटहरी प्रहरीलाई झुक्याएर फरार भएका १९ वर्षीय सुरज खड्का अन्ततः पक्राउ परेका छन् ।
प्रहरीका अनुसार फरार भएपछि खड्का पोखरा पुगेका थिए । उनले त्यहाँ एक होटलमा ग्राहक बनेर कोठा लिएपछि छेउकै कोठामा बसेका विदेशी पर्यटकको आइफोन र ल्यापटप चोरी गरी फरार भएको अनुसन्धानबाट खुलेको छ ।
चोरी गरेको मोबाइल प्रयोग गर्दै उनले फोनधनीलाई सम्पर्क गरी आफूलाई प्रहरी परिचय दिएका थिए । “तपाईंको फोन फेला परेको छ, भेरिफाइ गर्न लक कोड दिनुहोस्,” भन्दै उनले कोड माग्ने प्रयास गरेका थिए । तर, यही तरिकाले प्रहरीको शंका बढेपछि उनको खोजी तीव्र बनाइएको थियो ।
कास्की र इटहरी प्रहरीको संयुक्त टोलीले उनलाई शुक्रबार हेटौंडाबाट पक्राउ गरेको जनाएको छ ।
