ग्लोबल आइएमई बैंकको विराटनगर शाखामा कार्यरत खड्का मृत फेला
झापा । झापाको दमक नगरपालिका–८ लक्ष्मीमार्ग निवासी ४२ वर्षीय पिताम्बर खड्का आफ्नै घरमा मृत अवस्थामा फेला परेका छन्। उनी ग्लोबल आइएमई बैंकको विराटनगर शाखामा कार्यरत थिए।
सोमबार साँझ भएको उक्त घटनाले बैंकिङ क्षेत्र तथा स्थानीय समुदायमा चासो र शोक पैदा गरेको छ।
घटनाअघि खड्काले आफ्नो फेसबुकमा चार जना व्यक्तिको सामूहिक तस्बिर सार्वजनिक गर्दै गम्भीर आशयको स्टाटस लेखेका थिए। उक्त पोस्टमा उनले दीपचन्द्र रेग्मी, अनमिका कुँवर सिंह, सुरेन्द्र रेग्मी र सुमन पोखरेललाई उल्लेख गर्दै आफू यस्तो कदम चाल्न बाध्य भएको संकेत गरेका थिए।
इलाका प्रहरी कार्यालय दमकका अनुसार सोमबार साँझ करिब ५ बजे मृतकका बुवा महेश खड्काले उनलाई अचेत अवस्थामा देखेपछि प्रहरीलाई खबर गरेका थिए। त्यसपछि प्रहरी निरीक्षक नवीन राईको नेतृत्वमा टोली घटनास्थल पुगेको थियो।
दमक–८ का वडा अध्यक्ष धर्मप्रसाद दाहालका अनुसार शव पोस्टमार्टमका लागि दमक अस्पताल पठाइएको छ। प्रहरीले फेसबुक पोस्टलाई अनुसन्धानको महत्वपूर्ण आधार मानेर मृत्युको कारण तथा सम्भावित दुरुत्साहनको विषयमा अनुसन्धान अघि बढाएको जनाएको छ।
