उदयपुरमा मोटरसाइकल दुर्घटनामा परी एक युवकको मृत्यु
उदयपुर । उदयपुरमा मोटरसाइकल दुर्घटनामा परी मौसम राईको मृत्यु भएको छ।
चौदण्डीगढी–७ हाङ बजारका २८ वर्षीय राई बेल्टारदेखि गाईघाटतर्फ जाँदै गर्दा सोमबार साँझ मोटरसाइकल दुर्घटनामा गम्भीर घाइते भएका थिए।
उपचारका लागि उनलाई न्यूरो अस्पताल लगिएको थियो। तर उपचारकै क्रममा उनको मृत्यु भएको बताइएको छ।
राईले बेल्टारस्थित पुमा बोर्डिङ स्कुलमा पछिल्लो दुई वर्षदेखि कक्षा ८ सम्म कम्प्युटर साइन्स अध्यापन गराउँदै आएका थिए। विद्यालयका सञ्चालक किशोर ताम्राकारले उनको निधनप्रति दुःख व्यक्त गरेका छन्।
