उदयपुरमा मामाको खुकुरी प्रहारबाट भाञ्जी गम्भीर घाइते, आरोपी पक्राउ
उदयपुर । उदयपुरको त्रियुगा नगरपालिका–२ संगम टोलमा बिहीबार बिहान एक महिलामाथि खुकुरी प्रहार भएको छ । खुकुरी प्रहारबाट स्थानीय २९ वर्षीया सुमा राई गम्भीर घाइते भएकी छन् ।
प्रहरीका अनुसार बिहान करिब १०ः३० बजे स्थानीय रबिन्द्र पौडेलको घरको आँगनमा सोही स्थान बस्ने ४३ वर्षीय बिनोद राईले सुमा राईमाथि खुकुरी प्रहार गरेका हुन् । बिनोद राई पीडितका मामा नाता पर्ने व्यक्ति रहेको प्रहरीले जनाएको छ ।
घटनाको जानकारी प्राप्त हुनासाथ जिल्ला प्रहरी कार्यालय उदयपुरबाट प्रहरी निरीक्षक विष्णुबहादुर खड्काको नेतृत्वमा १० जनाको प्रहरी टोली घटनास्थलमा खटिएको थियो ।
प्रहरीका अनुसार खुकुरी प्रहारबाट सुमा राईको टाउको तथा शरीरका विभिन्न भागमा गम्भीर चोट लागेको छ । उनलाई तत्काल जिल्ला अस्पताल उदयपुरमा प्रारम्भिक उपचारपछि थप उपचारका लागि बिहान ११ः५० बजे विराटनगरस्थित न्युरो अस्पताल रिफर गरिएको प्रहरीले जनाएको छ ।
घटनामा संलग्न बिनोद राईलाई प्रहरीले तत्काल नियन्त्रणमा लिई जिल्ला प्रहरी कार्यालय उदयपुरको हिरासतमा राखेको छ । घटनाबारे थप अनुसन्धान भइरहेको प्रहरीले जनाएको छ ।
