पाँचथरमा जिप दुर्घटना हुँदा चालकको मृत्यु
पाँचथर । पाँचथरमा शुक्रबार बिहान भएको जिप दुर्घटनामा चालकको मृत्यु भएको छ।
याङवरक गाउँपालिका–६ अर्चले क्षेत्रमा प्रदेश ०१–००२ च १५६९ नम्बरको सिङ्गल क्याप पिकअप जिप दुर्घटनामा परेको जिल्ला प्रहरी कार्यालय पाँचथरले जनाएको छ।
दुर्घटनामा झापाको बाहदशी गाउँपालिका–५ निवासी ३५ वर्षीय गोपाल भट्टराईको घटनास्थलमै मृत्यु भएको प्रहरीले जनाएको छ। मृतक भट्टराई उक्त जिपका चालक हुन्।
पाँचथरका प्रहरी नायव उपरीक्षक अनिषकुमार कर्णका अनुसार जिपमा चालकसहित दुई जना सवार थिए। ओरालो सडकमा एक यात्रु पिसाब फेर्न ओर्लिएलगत्तै जिप अचानक आफैं गुडेर भिरबाट खसेको प्रारम्भिक अनुसन्धानबाट खुलेको छ।
दुर्घटनापछि चालक भट्टराईको घटनास्थलमै मृत्यु भएको प्रहरीले जनाएको छ। शव पोस्टमार्टमका लागि पाँचथर जिल्ला अस्पताल पठाइएको छ।
