पत्रकार महासंघद्वारा प्रेस स्वतन्त्रतामाथिको हस्तक्षेप र सामाजिक अपराधजन्य हर्कतको भर्त्सना
काठमाडौं । नेपाल पत्रकार महासंघ ले बाजुराको रानीसैनमा समाचार संकलनका क्रममा पत्रकारमाथि भएको दुर्व्यवहार, सञ्चार सामग्री तोडफोड तथा धम्कीप्रति गम्भीर ध्यानाकर्षण भएको जनाएको छ ।
महासंघद्वारा जारी विज्ञप्तिअनुसार जेठ ३ गते घटनास्थलमा पुगेका पत्रकार उमेशबहादुर शाहीको ड्रोन क्यामरा नियन्त्रणमा लिएर तोडफोड गरिएको थियो । साथै पत्रकार जनक बोहरा, अनिल शाही र जीतजंग कटेललाई तीन दिनसम्म सम्पर्कविहीन बनाइएको तथा उनीहरूले खिचेको भिडियोसमेत मेटाउन लगाइएको महासंघ बाजुरा शाखाले जनाएको छ । उनीहरू जेठ ६ गते शाखाको सम्पर्कमा आएका थिए ।
त्यसैगरी पत्रकार प्रकाशबहादुर सिंह, उमेशबहादुर शाही र जीतजंग कटेललाई सामाजिक सञ्जालमार्फत गालीगलौज तथा ज्यान मार्ने धम्कीसमेत दिइएको उल्लेख गरिएको छ ।
महासंघले प्रेस स्वतन्त्रतामाथिको हस्तक्षेप र सामाजिक अपराधजन्य यस्ता गतिविधिको कडा भर्त्सना गर्दै घटनाको निष्पक्ष छानबिन गरी संलग्न दोषीमाथि तत्काल कानुनी कारबाही गर्न सम्बन्धित निकायसँग माग गरेको छ ।
महासचिव रामप्रसाद दाहालद्वारा जारी विज्ञप्तिमा पत्रकारको सुरक्षाको प्रत्याभूति गर्नसमेत आग्रह गरिएको छ ।
