सप्तकोशी किनारमा मृत भेटिए केराबारीका अशोक सापकोटा
मोरङ । मोरङको केराबारी गाउँपालिका–९ देवीझोडाका ५४ वर्षीय अशोक सापकोटा सप्तकोशी किनारमा मृत अवस्थामा फेला परेका छन्।
जेठ ९ गतेदेखि हराइरहेका सापकोटाको खोजी गर्ने क्रममा उनी केराबारीबाट पश्चिमतर्फ गएको सूचना प्राप्त भएको थियो। त्यसपछि खोजीलाई तीव्र बनाइएको प्रहरीले जनाएको छ।
स्थानीयका अनुसार बराहक्षेत्र तल रहेको झोलुङ्गे पुलबाट हुलिया मिल्ने एक व्यक्ति सप्तकोशीमा हाम फालेको देखिएको थियो। सोही आधारमा गरिएको खोजीका क्रममा सुनसरीको बोराबाँध क्षेत्रमा पानीले सडेर क्षतविक्षत अवस्थामा बिहीबार शव फेला परेको हो।
प्रहरीले शव पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान (घोपा क्याम्पस) मा राखिएको जनाएको छ।
सापकोटा सामुदायिक वन तथा वातावरण संरक्षण अभियानमा सक्रिय रहँदै विभिन्न सामाजिक संघसंस्थामा आबद्ध थिए। केही समयदेखि ढाडको समस्याका कारण उनी थेरापीमार्फत उपचाररत रहेको बताइएको छ।
