जेनजी आन्दोलनको क्रममा इलाका प्रहरी कार्यालय उर्लाबारीको हिरासतबाट फरार युवती ९ महिनापछि पक्राउ
मोरङ । जिल्ला मोरङस्थित इलाका प्रहरी कार्यालय उर्लाबारीको हिरासत कक्षबाट फरार भएकी एक युवतीलाई प्रहरीले ९ महिनापछि पक्राउ गरेको छ।
पक्राउ पर्नेमा उर्लाबारी नगरपालिका–४ विशालटोल निवासी २२ वर्षीया एन्जिला दाहाल रहेकी छन्। लागूऔषध सम्बन्धी मुद्दामा अनुसन्धानका लागि हिरासतमा राखिएकी दाहाल गत वर्ष भदौ २४ गते हिरासतबाट फरार भएकी थिइन्।
प्रहरीका अनुसार दाहाल जेन्जी आन्दोलनका क्रममा सिर्जना भएको भीडभाड र असहज परिस्थितिको फाइदा उठाउँदै हिरासत कक्षबाट भाग्न सफल भएकी थिइन्। त्यसयता उनको खोजी कार्य जारी राखिएको थियो।
लामो समयको खोजीपछि प्रहरीले उनलाई पुनः नियन्त्रणमा लिएको जनाएको छ। पक्राउ परेकी दाहालमाथि लागूऔषध मुद्दासहित हिरासतबाट फरार भएको विषयमा समेत आवश्यक अनुसन्धान अघि बढाइएको प्रहरीले जनाएको छ।
घटनाबारे थप अनुसन्धान भइरहेको छ।
