मोरङमा धारिलो हतियारसहित १० जना पक्राउ, आक्रमणको योजना बनाएको आशंका
मोरङ । मोरङको पथरीशनिश्चरे नगरपालिका–९ र १० को सिमानामा पर्ने डाँस खोलाबाट धारिलो हतियार तथा विभिन्न औजारसहित १० जना युवा–युवती पक्राउ परेका छन्।
बुधबार राति करिब ११ः३० बजे डाँस खोलाको झोलुंगे पुलनजिक खोला किनारमा शंकास्पद रूपमा बसेका उनीहरूलाई इलाका प्रहरी कार्यालय पथरीबाट खटिएको गस्ती टोलीले नियन्त्रणमा लिएको हो।
पक्राउ पर्नेमा पथरीशनिश्चरे–१ की १८ वर्षीया आरिया धिमाल र कृपा लिम्बू, पथरीशनिश्चरे–४ का १८ वर्षीय एबिन राई, १९ वर्षीय सुप्रिम राई, १८ वर्षीय रिदम तामाङ, पथरीशनिश्चरे–९ का १८ वर्षीय निशान माझी र १८ वर्षीय सुशन ठटाल तथा पथरीशनिश्चरे–१० का १९ वर्षीय युजिन राई, १८ वर्षीय अपिल राई र २२ वर्षीय अभिषेक थापा रहेका छन्।
प्रहरीले उनीहरूको साथबाट कट्टी, खुर्पा, मार्तल, सानो हाते बन्चरो, चेन तथा भालाजस्ता धारिलो हतियार र औजार बरामद गरेको जनाएको छ। पक्राउ परेका सबैलाई इलाका प्रहरी कार्यालय पथरीको हिरासतमा राखी थप अनुसन्धान भइरहेको छ।
मोरङ प्रहरीका अनुसार पक्राउ परेकाविरुद्ध अभद्र व्यवहारसम्बन्धी मुद्दामा अनुसन्धान अघि बढाउन जिल्ला प्रशासन कार्यालयबाट म्याद थप गरिएको छ। इलाका प्रहरी कार्यालय पथरीका डीएसपी वीरदत्त पन्तको नेतृत्वमा घटनाबारे विस्तृत अनुसन्धान भइरहेको प्रहरीले जनाएको छ।
प्रहरीको प्रारम्भिक अनुसन्धानबाट उनीहरू गाउँमा भएको सामान्य विवादपछि सम्बन्धित व्यक्तिमाथि आक्रमण गर्ने योजनासहित धारिलो घरेलु हतियार लिएर बसेको खुलेको छ।
मोरङ प्रहरी प्रमुख एसपी कवित कटवालका अनुसार समयमै प्रहरीको हस्तक्षेपका कारण सम्भावित ठूलो घटना टरेको हो। उनले प्रहरीको सक्रियताले कुनै अप्रिय घटना हुन नपाएको भन्दै अनुसन्धान जारी रहेको बताए।
