इटहरीमा यातायात व्यवसायी तथा सरोकारवालासँग अन्तरक्रिया कार्यक्रम सम्पन्न
सुनसरी । कोशी प्रदेश सरकारको आन्तरिक मामिला तथा कानुन मन्त्रालयको आयोजनामा इटहरीमा यातायात व्यवसायी तथा सरोकारवालाहरूसँग सुझाव संकलन तथा अन्तरक्रिया कार्यक्रम सम्पन्न भएको छ।
जेठ २४ गते इटहरीस्थित गंगा–जमुना पार्टी प्यालेसमा आयोजित कार्यक्रममा कोशी प्रदेश सरकारका आन्तरिक मामिला तथा कानुन मन्त्री इन्द्रमणि पराजुली को प्रमुख आतिथ्यता रहेको थियो।
कार्यक्रममा मन्त्रालयका सचिव कृष्णप्रसाद सापकोटा, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रमुख प्रहरी उपरीक्षक दिपक गिरी लगायतको सहभागिता रहेको थियो।
त्यसैगरी, नेपाल यातायात व्यवसायी राष्ट्रिय महासंघ कोशी प्रदेशका संयोजक, विभिन्न सरोकारवाला निकायका प्रतिनिधि, यातायात व्यवसायी संघ–संगठनका प्रमुख तथा प्रतिनिधि, यातायात मजदुर संघ–संगठनका प्रतिनिधि तथा ड्राइभिङ स्कुल संघका प्रतिनिधिहरूको उल्लेखनीय उपस्थिति रहेको थियो।
कार्यक्रममा यातायात क्षेत्रका विद्यमान समस्या, सुधारका सम्भावना, सडक सुरक्षा, ट्राफिक व्यवस्थापन तथा सेवामुखी यातायात प्रणाली निर्माणका विषयमा सुझाव संकलन तथा छलफल गरिएको आयोजकले जनाएको छ।
