विराटनगरमा आयल निगमको पार्किङबाट पेट्रोल बोकेको ट्याङ्कर चोरी, हुलाकी सडकमा बेवारिसे अवस्थामा फेला
विराटनगर । विराटनगरस्थित नेपाल आयल निगमको कोशी प्रादेशिक कार्यालयको पार्किङबाट पेट्रोल बोकेको ट्याङ्कर चोरी भएको छ। पार्किङमा राखिएको नवीन ढुवानी सेवाको को १ ख ६१९० नम्बरको ट्याङ्कर गएराति चोरी भएको हो।
नेपाल आयल निगम कोशी प्रादेशिक कार्यालय विराटनगरका प्रमुख पुस्कर कार्कीका अनुसार राति पार्किङमा राखिएको ट्याङ्कर आज बिहान हराएको जानकारी प्राप्त भएको थियो। खोजी गर्ने क्रममा उक्त ट्याङ्कर सुनसरीको बर्जु गाउँपालिका क्षेत्रमा पर्ने हुलाकी सडकखण्डमा सोमबार बिहान करिब ११ बजे बेवारिसे अवस्थामा फेला परेको हो। हाल ट्याङ्करलाई सुनसरी प्रहरीले नियन्त्रणमा लिएको छ।
ट्याङ्कर धनी नवीन कर्णका अनुसार ट्याङ्करमा करिब २० हजार लिटर पेट्रोल लोड गरिएको थियो। भारतको सिलीगुडीबाट तेल ल्याएर आइतबार साँझ ८ बजे आयल निगमको पार्किङमा राखिएको थियो।
कर्णका अनुसार चालकहरू निगममा सञ्चालन भइरहेको तालिममा सहभागी भएका बेला ट्याङ्कर चोरी भएको हो। “हामी सबैजना तालिममा थियौं, बिहान साढे ८ बजेतिर मात्रै गाडी नभएको थाहा पायौं,” उनले भने।
प्रारम्भिक नापजाँचका आधारमा ट्याङ्करबाट झण्डै एक हजारदेखि १२ सय लिटरसम्म पेट्रोल चोरी भएको अनुमान गरिएको छ। तर, ट्याङ्कर फेला परेको स्थान भिरालो र कोल्टे परेकाले कति परिमाणमा तेल हराएको हो भन्ने यकिन मुचुल्का उठाएर डिपोमा ल्याएपछि मात्रै हुने कर्णले बताए।
घटनापछि जिल्ला प्रहरी कार्यालय सुनसरीबाट खटिएको टोलीले घटनास्थलमा पुगेर अनुसन्धान थालेको छ। मंगलबार जिल्ला प्रहरी कार्यालय मोरङ, ढुवानी प्रतिनिधि तथा आयल निगमका अधिकारीहरूको उपस्थितिमा मुचुल्का उठाएर ट्याङ्करलाई डिपोमा ल्याइने तयारी गरिएको छ।
जिल्ला प्रहरी कार्यालय सुनसरीका प्रहरी नायव उपरीक्षक चन्द्र खड्काले भोक्राहा नरसिंह गाउँपालिका–८ स्थित हुलाकी राजमार्गमा ट्याङ्कर बेवारिसे अवस्थामा फेला परेको जानकारी दिए।
“चोरी गरेर हुलाकी राजमार्गमा ल्याई छाडिएको देखिन्छ। घटनाबारे थप अनुसन्धान भइरहेको छ,” डीएसपी खड्काले भने। उनले पनि प्रारम्भिक रूपमा करिब एक हजारदेखि १२ सय लिटर तेल चोरी भएको अनुमान गरिएको बताए।
