उदयपुरको कटारीमा टिपर दुर्घटना: सात जना घाइते, चालक फरार
उदयपुर । उदयपुरको कटारी नगरपालिका–१ पानीट्याङ्कीस्थित सिद्धिचरण लोकमार्गमा आइतबार टर्निङ लिने क्रममा खोक्साबाट मिर्चैयातर्फ जाँदै गरेको ना १ क ५५४९ नम्बरको टिपर अनियन्त्रित भई सडक किनारमा पल्टिँदा सात जना घाइते भएका छन्।
दुर्घटनामा कटारी नगरपालिका–२ गुराँसेका ६० वर्षीय शेरबहादुर थापा, ५० वर्षीया सुनिता थापा, २३ वर्षीया जेनी श्रेष्ठ, ४८ वर्षीया सीता श्रेष्ठ, ३९ वर्षीया यशोदा खड्का, ४० वर्षीया कृजा थापा र ४० वर्षीय कुलबहादुर अधिकारी घाइते भएका हुन्।
घाइतेमध्ये शेरबहादुर थापा र सुनिता थापाको मिर्चैयास्थित मनकामना अस्पतालमा उपचार भइरहेको छ भने अन्य पाँच जनाको मिर्चैयास्थित विष्णु क्लिनिकमा उपचार भइरहेको र उनीहरूको अवस्था सामान्य रहेको प्रहरीले जनाएको छ।
दुर्घटनापछि टिपर चालक कटारी नगरपालिका–२ ददरिया बस्ने २३ वर्षीय राजेश दनुवार फरार रहेका छन्। उनको खोजी कार्य जारी रहेको जिल्ला प्रहरी कार्यालयले जनाएको छ। दुर्घटनाग्रस्त टिपर घटनास्थलमै रहेको छ।
