सामुदायिक वनबाट बेवारिसे आठ थान भरुवा बन्दुक बरामद
पर्वत । पर्वतको मोदी गाउँपालिका–८ महकेस्थित लेते खोला ठाडो पाखा सामुदायिक वनबाट बेवारिसे अवस्थामा लुकाइ राखिएका आठ थान अवैध भरुवा बन्दुक प्रहरीले बरामद गरेको छ।
वन क्षेत्रमा अवैध हातहतियार लुकाइ राखिएको भन्ने विशेष सूचनाका आधारमा खटिएको प्रहरी टोलीले उक्त क्षेत्रमा खोजतलास गर्ने क्रममा नाल र काठसहितका आठ थान भरुवा बन्दुक फेला पारेको हो।
प्रहरीले बरामद भएका हातहतियारको मुचुल्का तयार गर्ने कार्य भइरहेको जनाएको छ। साथै, ती बन्दुक कसले, कहिले र कुन उद्देश्यले वन क्षेत्रमा लुकाएको हो भन्ने विषयमा थप अनुसन्धान अघि बढाइएको प्रहरीले जनाएको छ।
