सुनसरीमा १.०५ ग्राम ब्राउन सुगर सहित मोटरसाइकल चालक पक्राउ
सुनसरी, असार २१ । सुनसरी प्रहरीले १.०५ ग्राम ब्राउन सुगरसहित एक जनालाई पक्राउ गरेको छ।
जिल्ला प्रहरी कार्यालय सुनसरी र इलाका प्रहरी कार्यालय लौकहीबाट संयुक्त रूपमा खटिएको प्रहरी टोलीले शुक्रबार साँझ करिब ५:३९ बजे भोक्राहा नरसिंह गाउँपालिका–३ स्थित खुनिया पुल क्षेत्रमा चेकजाँचका क्रममा भारतबाट नेपालतर्फ आउँदै गरेको प्रदेश १-०२-०४१ प ९०४३ नम्बरको मोटरसाइकल रोकेको थियो।
चालक बराहक्षेत्र नगरपालिका–७ निवासी २० वर्षीय समिर खड्काको शरीर तथा सामान जाँच गर्दा १.०५ ग्राम ब्राउन सुगरजस्तो देखिने पदार्थ फेला परेपछि उनलाई मोटरसाइकलसहित नियन्त्रणमा लिइएको प्रहरीले जनाएको छ।
पक्राउ परेका खड्काविरुद्ध लागूऔषध सम्बन्धी कसुरमा जिल्ला प्रहरी कार्यालय सुनसरीमा थप अनुसन्धान भइरहेको प्रहरीले जनाएको छ।
