नहरमा युवतीको शव फेला, पोस्टमार्टम रिपोर्टपछि मात्रै मृत्युको रहस्य खुल्ने
सञ्जय मिश्रा/रौतहट, २५ असार। रौतहटको राजपुर नगरपालिकास्थित सडकछेउको नहरमा बिहीबार बिहान एक २४ वर्षीया महिलाको शव फेला परेको छ।
घटनाबारे प्रहरीले अनुसन्धान तीव्र बनाएको छ भने मृत्युको वास्तविक कारण पोस्टमार्टम रिपोर्ट आएपछि मात्रै यकिन हुने जनाएको छ।
बिहीबार बिहान करिब ७ः२० बजे राजपुर नगरपालिका–३ मा रहेको राजपुर डमारबाट फतुवा जाने सडकछेउको नहरको खाल्डोमा महिलाको शव देखिएको सूचना प्राप्त भएपछि इलाका प्रहरी कार्यालय राजपुर र जिल्ला प्रहरी कार्यालय रौतहटबाट अपराध अनुसन्धान टोली घटनास्थल पुगेको थियो।
प्रहरीको प्रारम्भिक अनुसन्धानबाट मृतक परोहा नगरपालिका–५ निवासी शेख मोबिनकी श्रीमती २४ वर्षीया मुस्कान खातुन रहेको खुलेको छ। घटनास्थलमा आवश्यक कानुनी प्रक्रिया पूरा गरी शव पोस्टमार्टमका लागि प्रादेशिक अस्पताल गौर पठाइएको प्रहरीले जनाएको छ।
जिल्ला प्रहरी कार्यालय रौतहटका प्रवक्ता डिएसपी बसन्त गौतमका अनुसार मृतकको शरीरमा बाहिरी रूपमा देखिने कुनै चोटपटक फेला परेको छैन। उनले मुस्कान यसअघि पनि घरबाट सम्पर्कविहीन भएकी र उनको खोजीका लागि प्रहरीमा निवेदन परेको जानकारी दिए।
प्रहरीले घटनाका सबै पक्षबाट अनुसन्धान भइरहेको जनाएको छ। मृत्यु दुर्घटना, आत्महत्या वा अन्य कुनै कारणले भएको हो भन्ने विषय पोस्टमार्टम रिपोर्ट प्राप्त भएपछि मात्रै स्पष्ट हुने प्रहरीको भनाइ छ।
