सुनसरीमा पिकअप दुर्घटना : चालकको मृत्यु, एक जना घाइते
सुनसरी । सुनसरीको कोशी गाउँपालिका–८ स्थित महेन्द्र राजमार्गमा पिकअप दुर्घटना हुँदा चालकको मृत्यु भएको छ भने एक जना घाइते भएका छन्।
भण्टाबारीबाट लौकहीतर्फ जाँदै गरेको प्र १-०२-००२ च ४८३१ नम्बरको खाली पिकअप गएराति अनियन्त्रित भएर दुर्घटनामा परेको प्रहरीले जनाएको छ।
दुर्घटनामा मोरङको रंगेली नगरपालिका–३ दर्वेशाका ४२ वर्षीय चालक पदम राई गम्भीर घाइते भएका थिए। उनलाई उपचारका लागि जिल्ला अस्पताल इनरुवा लगिए पनि उपचारकै क्रममा मृत्यु भएको सुनसरी प्रहरीले जनाएको छ।
दुर्घटनामा पिकअपमा सवार सिरहाको लहान नगरपालिका घर भई हाल विराटनगर–१३ बस्दै आएका ३७ वर्षीय सन्तोषकुमार साह घाइते भएका छन्। प्रहरीका अनुसार उनको अवस्था सामान्य रहेको छ।
