वेवारिसे अवस्थामा लुकाइएका ७ थान अवैध भरुवा बन्दुक बरामद
पर्वत । पर्वत प्रहरीले जिल्लाभित्र शान्ति–सुरक्षा कायम राख्न तथा अवैध हातहतियार नियन्त्रण अभियानलाई निरन्तरता दिँदै विभिन्न डाँडाबाट ७ थान बेवारिसे अवैध एकनाले भरुवा बन्दुक बरामद गरेको छ।
जिल्ला प्रहरी कार्यालयका अनुसार असार २५ गते सञ्चालन गरिएको खोजतलासका क्रममा वन्यजन्तु तथा पशुपन्छीको अवैध सिकारमा प्रयोग हुन सक्ने ७ थान भरुवा बन्दुक फेला पारेर कानुनी प्रक्रिया अनुसार बरामद गरिएको हो।
प्रहरीका अनुसार चालु अभियानअन्तर्गत हालसम्म पर्वत जिल्लाबाट कुल ३६ थान बेवारिसे अवैध एकनाले भरुवा बन्दुक बरामद गरिएको छ। यस्ता अवैध हातहतियार नियन्त्रण अभियानलाई आगामी दिनमा पनि निरन्तरता दिइने प्रहरीले जनाएको छ।
