इटहरीमा किशोरको मृत्यु प्रकरण: आत्महत्या दुरुत्साहन आरोपमा चार जना पक्राउ
सुनसरी । इटहरीमा १६ वर्षीय किशोर मृत फेला परेको घटनामा आत्महत्या दुरुत्साहनको आरोपमा चार जनालाई पक्राउ गरी प्रहरीले अनुसन्धान अघि बढाएको छ।
जिल्ला प्रहरी कार्यालय सुनसरीका अनुसार साउन १९ गते दिउँसो करिब २:३० बजे इटहरी उपमहानगरपालिका–९ भद्रटोलस्थित डेरामा बस्दै आएका बुद्धिसागर न्यौपानेका १६ वर्षीय छोरा सरोज न्यौपाने आफ्नै कोठाभित्र सिलिङ पंखामा सलको पासो लगाई झुण्डिएको अवस्थामा मृत फेला परेका थिए।
घटनापछि साउन २० गते आत्महत्या दुरुत्साहन कसुरमा जाहेरी परेपछि प्रहरीले चार जनालाई पक्राउ गरेको हो। जिल्ला अदालत सुनसरीबाट पाँच दिनको म्याद थप अनुमति लिएर इलाका प्रहरी कार्यालय इटहरीले घटनाबारे थप अनुसन्धान गरिरहेको जनाएको छ।
पक्राउ पर्नेहरूमा इटहरी उपमहानगरपालिका–९ निवासी २७ वर्षीय अशोक न्यौपाने, ३३ वर्षीय नमराज न्यौपाने, ४३ वर्षीय बुद्धिसागर न्यौपाने र ३९ वर्षीया मुना न्यौपाने रहेका छन्।
प्रहरीले आत्महत्या दुरुत्साहन सम्बन्धी कसुरमा थप अनुसन्धान जारी रहेको जनाएको छ।
