खोटाङमा ट्रकको फल्स बटमबाट १ हजार ३१५ किलो गाँजा बरामद, चालक फरार
खोटाङ । खोटाङ प्रहरीले ट्रकमा बनाइएको फल्स बटमबाट १ हजार ३१५ किलो गाँजा बरामद गरेको छ।
जिल्ला प्रहरी कार्यालय खोटाङका अनुसार साउन २२ गते राति करिब १२ः३० बजे दिक्तेल रुपाकोट मझुवागढी नगरपालिका–७ वालिङस्थित मध्यपहाडी लोकमार्गको जंगलमा शंकास्पद अवस्थामा रोकिराखिएको प्रदेश १–०२–००२ ख ००८३ नम्बरको ट्रकलाई प्रहरीले जाँच गरेको थियो।
प्रहरी निरीक्षक निराजन बस्नेतको नेतृत्वमा खटिएको टोलीले ट्रकको सूक्ष्म निरीक्षण गर्दा चालक बस्ने भाग र पछाडिको डालाबीच फल्स बटम बनाई लुकाइछिपाइ राखिएको अवस्थामा १ हजार ३१५ किलो गाँजा फेला पारेको हो।
बरामद गरिएको गाँजासहित ट्रकलाई नियन्त्रणमा लिएर जिल्ला प्रहरी कार्यालय खोटाङमा राखिएको छ।
घटनामा संलग्न ट्रकका चालक तथा धनी फरार रहेकाले उनीहरूको खोजी कार्य जारी रहेको प्रहरीले जनाएको छ। साथै घटनाबारे थप अनुसन्धान भइरहेको छ।
