सामुदायिक वनबाट १३ थान भरुवा बन्दुक बरामद
प्युठान । प्युठानमा बेवारिसे अवस्थामा लुकाएर राखिएका १३ थान भरुवा बन्दुक र दुई थान नाल बरामद गरिएको छ।
इलाका प्रहरी कार्यालय लुङबहाने, प्युठानबाट खटिएको गस्ती टोलीले नौबहिनी गाउँपालिका–२ डाँडाकटेरीस्थित मनकामना सामुदायिक वन र सुनसरी खोल्सामा गस्ती गर्ने क्रममा झारपातले छोपेर राखिएको अवस्थामा उक्त हतियार फेला पारेको हो।
प्रहरीका अनुसार १३ थान साबुत भरुवा बन्दुक र सोही बन्दुकका दुई थान नाल नियन्त्रणमा लिइएको छ।
बरामद हतियार कसले र कुन प्रयोजनका लागि त्यहाँ लुकाएर राखेको हो भन्ने विषयमा प्रहरीले थप अनुसन्धान गरिरहेको जनाएको छ।
