दुई तले घरमा भिषण आगलागी, १९ लाख बराबरको क्षति
सञ्जय मिश्रा,
रौतहट, २५ साउन।
रौतहटको फतुवा विजयपुर नगरपालिका–१० दुधिअवामा विद्युत् सर्ट भएर दुई तले घरमा आगलागी हुँदा नगदसहित करिब १९ लाख १३ हजार रुपैयाँ बराबरको क्षति भएको छ।
जिल्ला प्रहरी प्रवक्ता डिएसपी बसन्त गौतमका अनुसार सोमबार बिहान करिब ७ः४५ बजे खरेल इँटा उद्योगका साहु दीपेन्द्र खरेलको काठले बनेको जस्तापाताको छाना भएको दुई तले घरमा अचानक आगलागी भएको हो। खरेल मकवानपुरको हेटौँडा उपमहानगरपालिका–४ का बासिन्दा हुन्। उनी हाल दुधिअवामा बस्दै आएका छन्।
विद्युत् लाइन सर्ट भएर लागेको आगोले घर पूर्ण रूपमा जलेर नष्ट भएको जिल्ला प्रहरी कार्यालय रौतहटले जनाएको छ। घरभित्र राखिएको २ लाख रुपैयाँ नगदसहित अन्य सामान जल्दा कुल १९ लाख १३ हजार रुपैयाँ बराबरको क्षति भएको प्रहरीको प्रारम्भिक विवरण छ।
आगलागीमा कुनै मानवीय तथा चौपाया क्षति नभएको प्रहरीले जनाएको छ।
घटनाको सूचना पाएलगत्तै इलाका प्रहरी कार्यालय लक्ष्मिनिया विजयपुरबाट इन्स्पेक्टर रादेश कुमार खत्रीको नेतृत्वमा ९ जना प्रहरी टोली घटनास्थल पुगेको थियो। प्रहरी चौकी दुधिअवाबाट थप ३ जना तथा सशस्त्र प्रहरी बेस विजयपुर लक्ष्मिनियाबाट इन्स्पेक्टर काजीराम श्रेष्ठको नेतृत्वमा ९ जना सशस्त्र प्रहरी पनि परिचालन गरिएको थियो।
प्रहरी, सशस्त्र प्रहरी, स्थानीयवासी तथा बारा जिल्लाको कोल्हबी नगरपालिकाको दमकलको सहयोगमा करिब डेढ घण्टापछि बिहान ९ः१० बजे आगो पूर्ण रूपमा नियन्त्रणमा लिइएको थियो।
घटनाको कारण विद्युत् लाइन सर्ट भएको प्रारम्भिक जानकारी आए पनि आगलागीबाट भएको क्षतिको विस्तृत विवरण तथा घटनाबारे थप अनुसन्धान भइरहेको प्रहरीले जनाएको छ।
